A UVigo precisa recuperar un sistema de enquisas docentes útil, crible e orientado á mellora real da docencia.
Nos últimos anos, o modelo foise arrinconando ata permitir, na práctica, que as enquisas non cheguen a realizarse ou dependan en exceso da activación voluntaria de cada docente, o que reduce a súa utilidade como ferramenta de recollida de información e realimentación, debilita indicadores que seguen tendo efectos académicos e profesionais, e transmite unha mensaxe contraditoria ao profesorado e ao estudantado.
Sen converter as enquisas no único criterio de calidade docente, revisaremos o sistema para garantir a súa realización efectiva, cun deseño máis claro, mellores condicións de participación e maior fiabilidade dos resultados. Adoptaranse boas prácticas xa consolidadas noutros sistemas universitarios: cuestionarios máis breves e útiles, xanelas de resposta mellor integradas no calendario académico, mecanismos que favorezan a participación do estudantado e devolución dos resultados en clave de mellora. Estudaranse ademais fórmulas que aumenten a representatividade (incluíndo, cando sexa viable, momentos presenciais ou mecanismos alternativos de resposta) e actualizarase o cuestionario para facelo máis útil, breve e orientado á mellora.
O obxectivo é contar cun instrumento serio de avaliación e mellora docente, con datos máis sólidos e máis capacidade para orientar cambios reais na práctica académica.