Poñeremos en marcha un Plan de Transformación Organizativa e Dixital para converter a mellora de procesos nunha capacidade interna estable da UVigo.
O Plan desenvolverase a través, primeiro, dunha carteira de pilotos en cada campus, e despois, dunha serie de proxectos anuais priorizados, orientada a revisar procesos críticos, clarificar roles, ordenar fluxos de traballo e fixar estándares mínimos de funcionamento antes de automatizar. Traballarase por fases curtas (diagnose e deseño, piloto con usuarios reais e avaliación antes da extensión) para asegurar cambios útiles e sostibles.
Cada proxecto terá responsable de proceso, equipo de mellora, calendario definido e medición antes e despois en tempos de tramitación, incidencias, retraballo e satisfacción das persoas usuarias. Os resultados servirán para orientar recursos, reforzar unidades e apoiar actualizacións progresivas da organización e da RPT a partir de funcións e cargas contrastadas.
O obxectivo é que a transformación deixe de depender de impulsos illados e pase a formar parte do funcionamento ordinario da universidade.