A UVigo debe avanzar cara a un modelo máis xusto de recoñecemento da actividade docente do PDI, baseado en criterios estables que teñan en conta a carga real. Nos últimos anos, algunhas normas resultaron excesivamente complexas, deixaron sen recoñecemento claro tarefas académicas relevantes e, mesmo cando recoñecen formalmente horas de traballo, impoñen límites que impiden que ese recoñecemento teña efecto real sobre a carga docente, xerando sensación de arbitrariedade e desconfianza.
Abordaremos esta situación mediante unha revisión dos criterios de planificación docente que permita recoñecer de forma máis axeitada a complexidade organizativa e avaliadora e as situacións de sobrecarga estrutural, como a docencia en grupos numerosos. Esta revisión deberá permitir tamén, con criterios graduados e compatibles coa planificación académica de centros e departamentos, o recoñecemento doutras responsabilidades académicas de alta esixencia e impacto institucional que hoxe teñen escaso ou nulo reflexo na carga docente, entre elas a dirección de proxectos estratéxicos de investigación.
Como primeira medida prudente e aplicable desde o inicio, establecerase un recoñecemento reforzado para os supostos definidos como docencia masiva, cunha referencia mínima orientativa de cando menos un 10% adicional por crédito. Esta revisión aplicarase con carácter prioritario á docencia de primeiro curso e ás materias con maior intensidade de seguimento, incluíndo aquelas con grupos numerosos, prácticas e laboratorio, onde a carga docente real non sempre queda ben reflectida polos criterios ordinarios. Desenvolverase unha fase inicial con avaliación de resultados, que permitirá valorar a súa extensión progresiva a outros cursos e titulacións en función da viabilidade organizativa e orzamentaria.
A auditoría integral das contas da UVigo comprometida para o inicio do mandato permitirá revisar e axustar este mínimo inicial con datos reais e criterios compartidos, e ofrecerá ademais unha base sólida para fundamentar, no marco normativo e organizativo aplicable, o recoñecemento doutras sobrecargas estruturais relevantes para a capacidade investigadora e a proxección internacional da universidade. Queremos construír un sistema de recoñecemento máis xusto, pero tamén serio e sostible: con medidas aplicables desde o inicio, avaliación dos seus efectos e capacidade para ampliar o modelo con garantías, evitando promesas maximalistas sen soporte técnico, xurídico nin orzamentario.