A nosa candidatura non vén a arbitrar conflito tras conflito; vén a xogar o partido da universidade investigadora con ambición e cabeza. Mesmo cun bo marco e con criterios claros, se non existe un mecanismo estable de decisión, os problemas do PI/PAI volverán resolverse a golpe de urxencia, interpretacións dispersas ou reacción a sentenzas.

A Universidade de Vigo precisa asumir con claridade que a investigación non é unha actividade administrativa, senón unha función estratéxica que require persoal de investigación e de apoio ben integrado nun contexto científico e tecnolóxico que nunca cambiou con tanta velocidade, e que por tanto muda as necesidades de contratación (cuantitativa e cualitativamente) con moita máis frecuencia.

Estableceremos un marco estable para a xestión das contratacións e retribucións asociadas a axudas competitivas (especialmente posdoutorais), garantindo seguridade xurídica e económica para as persoas beneficiarias.

Implantaremos un protocolo de acollida para novas incorporacións ao PDI: información clara, alta administrativa áxil, guía de servizos por campus, acceso ordenado ás ferramentas e procedementos básicos, apoio á integración na unidade e rede de mentorización interna (persoa referente).