A mobilidade internacional de PDI e PTXAS é unha ferramenta clave para crear redes, mellorar a docencia, coñecer outras formas de organización e abrir oportunidades para a UVigo, pero hoxe está insuficientemente recoñecida, mal acompañada e, en demasiados casos, penalizada por axudas escasas que obrigan a asumir custos do propio peto.
Esta medida manterá a plena liberdade de destino e creará unha liña adicional para orientar mobilidades a alianzas prioritarias e cooperación sostida, cunha tramitación máis doada, modelos e prazos claros, acompañamento administrativo e un pequeno fondo operativo para gastos necesarios. Revisaranse ademais os mecanismos de apoio e compensación para que a mobilidade docente e profesional non dependa do sacrificio económico individual, e darase maior visibilidade ao seu valor na traxectoria académica e profesional.
No caso do PTXAS, impulsarase activamente a participación e estableceranse protocolos claros de acollida para persoal internacional que veña á UVigo.
O obxectivo é transformar a mobilidade nunha política útil e recoñecida, e non un conxunto de esforzos individuais difíciles de soster.