Conciliar non significa traballar menos, senón poder organizar mellor o tempo académico con criterios previsibles.
Por iso, a planificación docente deberá incorporar, cando sexa compatible coas necesidades e coa equidade entre áreas, centros e titulacións, criterios de compactación razoable da docencia e das prácticas, evitando horarios excesivamente dispersos, ocos improdutivos e cambios de última hora que dificultan a conciliación e penalizan a organización da actividade investigadora e persoal.
No primeiro ano promoveremos criterios comúns de planificación e asignación horaria que melloren a antelación, a coordinación e a transparencia, reducindo improvisacións e desequilibrios evitables. Revisaranse tamén as dinámicas que concentran picos de carga en determinados momentos do curso, especialmente en docencia, avaliación, coordinación e tarefas académicas non sempre visibles, para avanzar cara a unha distribución máis sostible do traballo. Estableceranse ademais mecanismos de adaptación en situacións acreditadas de coidados, saúde ou outras circunstancias persoais, con garantías de equidade interna e compatibilidade co funcionamento docente.
O obxectivo é avanzar cara a unha organización máis racional do tempo académico, mellorando as condicións reais de conciliación sen deteriorar a calidade da docencia nin a corresponsabilidade no funcionamento dos centros e titulacións.