Desenvolverase un Plan de Mobilidade por campus para reducir a dependencia do coche individual e mellorar a seguridade, a accesibilidade e a conexión funcional entre espazos universitarios. Definiranse medidas internas executábeis: itinerarios peonís seguros e continuos, mellora de iluminación e sinalización, aparcadoiros para bicicletas e patinetes con criterios de seguridade, puntos de intermodalidade e información clara, e xestión do aparcamento con regras públicas que prioricen accesibilidade e necesidades de servizo.
O plan incorporará tamén unha liña específica de mobilidade intercampus e intersedes, orientada a facilitar o acceso a docencia intercentros, laboratorios e servizos comúns, actividades académicas e iniciativas de participación universitaria. No primeiro ano elaborarase un estudo de demanda, rutas, custes e franxas horarias e activarase unha fase piloto nas conexións de maior utilidade acreditada entre Vigo, Pontevedra e Ourense, así como entre sedes universitarias de especial relación funcional. O despregamento poderá combinar servizos programados, reforzos específicos e convenios con outras administracións ou operadores, evitando estruturas ríxidas sen demanda suficiente.
As actuacións que dependan de terceiros (paradas, frecuencias, conexións ciclábeis externas, seguridade viaria e calmado de tráfico) tramitaranse mediante convenios con concellos e operadores, cun calendario e compromisos. O programa contará con criterios públicos de acceso, sistema de reserva ou validación cando proceda, e avaliación semestral de uso, incidencias, custo e impacto académico e social. Publicarase unha relación anual de acordos, indicadores básicos e estado de execución. A medida combina cambios internos de baixo custo con negociación institucional estruturada e solucións flexibles de mobilidade, evitando prometer servizos sen base real e priorizando melloras que se noten desde o primeiro ano.