Desenvolverase un programa por campus para converter os espazos exteriores en infraestrutura real de benestar e adaptación climática: máis sombra e confort térmico, itinerarios peonís agradables e seguros, e unha xestión da auga máis eficiente.
Elaborarase un diagnóstico rápido por campus (zonas de maior exposición, falta de arborado, puntos de calor, drenaxe e escorrentías) e unha carteira por fases: fase 1 (actuacións de baixo custo e impacto rápido: sombra lixeira, puntos de descanso, mellora de itinerarios e sinalización), fase 2 (arborado e renaturalización con especies axeitadas e control de invasoras), fase 3 (solucións estruturais: drenaxe sostible, recuperación de solos e remodelación de espazos). Incorporaranse criterios de biodiversidade e mantemento para evitar “xardinería ornamental” sen continuidade, e publicarase unha ficha anual de actuacións e estado.
O obxectivo é un campus máis habitable, atractivo e resiliente, sen depender de anuncios grandilocuentes: con obras pequenas ben escollidas e coidadas no tempo.