A UVigo implantará unha porta de entrada única para calquera actividade de I+D+i, que actúe como punto claro de acceso, orientación inicial, rexistro e seguimento das solicitudes, incluíndo unha canle única de incidencias para consultas e bloqueos ao longo do proceso.
Sobre esta base, garantirase un servizo e acompañamento integral ao longo de todo o ciclo, desde o asesoramento previo ata a xustificación final, evitando itinerarios múltiples entre unidades e reducindo a fragmentación da xestión.
Este modelo combinará un punto único de entrada cunha organización interna coordinada entre as áreas implicadas en cada fase (convocatorias, contratos e convenios, compras, viaxes, contratación, seguimento económico, xustificación e auditorías), mantendo a especialización técnica pero con criterios comúns e información compartida. O persoal investigador poderá coñecer en todo momento o estado do expediente, as tarefas pendentes e a unidade responsable en cada fase, sen ter que recorrer a múltiples interlocutores nin depender de contactos informais.
A Oficina será responsable de definir e manter un estándar único UVigo, con modelos actualizados, procedementos para casos tipo e criterios de aplicación comúns en todos os campus e unidades, así como un circuíto claro de validación e sinaturas. Ademais, incorporará un apoio de proximidade á xestión administrativa, especialmente orientado a equipos de investigación con menor capacidade de apoio propio, para reducir desigualdades e garantir unha atención estable e equitativa en todos os campus.
Como peza de gobernanza operativa, o modelo incluirá un cadro de mando básico de cargas, tempos de tramitación e incidencias, por tipoloxía e campus/unidade, que permita identificar colos de botella, anticipar necesidades e planificar recursos con criterios obxectivos.
A implantación farase por fases, priorizando os ámbitos con maior volume e sensibilidade ao tempo, e avaliarase periodicamente para consolidar o modelo sen aumentar carga nin duplicidades.