A UVigo activará un programa de proba de concepto baseado na reordenación de recursos existentes e na súa orientación a resultados, cunha dotación inicial prudente e cun efecto multiplicador a través da captación de financiamento externo e da colaboración con empresas e administracións.
O programa combinará: (1) microfinanciamento PoC competitivo para madurar resultados (prototipo, validación técnica, ensaios, software, regulatorio básico e modelo de negocio); (2) validación en contorna real mediante pilotos e demostradores asociados a socios concretos da industria e do sector público, coordinados coas estruturas de transferencia e coas unidades de xestión para asegurar prazos razoables e seguridade xurídica; e (3) acompañamento profesional en transferencia, con apoio en propiedade intelectual, contratos, requisitos de mercado e procura de socios.
As convocatorias serán rápidas, con criterios adaptados por ámbitos e foco en resultados comprobables (TRL/validez, primeiros pilotos, cartas de interese, adopción real), evitando programas centrados no “pitch” sen percorrido. O PoC incluirá un itinerario de saída claro (licenza, contrato/piloto, spin-off ou start-up) e un panel de indicadores por fase para orientar decisións, priorizar recursos e asegurar que o investimento se traduce en impacto real no territorio. A implantación farase de maneira gradual, cunha primeira convocatoria piloto e avaliación anual de resultados, para consolidar un instrumento útil e adaptado á capacidade real da UVigo. O mecanismo anual máis amplo de retos e pilotos co territorio artéllase noutra medida para non duplicar instrumentos e para que o PoC se centre na maduración e validación tecnolóxica.
Con esta medida gañaremos máis proxectos listos para licenciar ou crear empresa, máis colaboración co tecido produtivo e co sector público e unha vía concreta para que a vangarda científica da UVigo se traduza en valor e retorno institucional.